Wara s-suċċess emozzjonali ta’ Fil-Ħoss tar-Riħ – kanzunetta dedikata lill-memorja ta’ missieru – il-produttur mużikali Rene’ Mamo jerġa’ lura b’biċċa mużika ġdida bl-isem Illum. Din id-darba, qed jikkollabora mal-artista Rita Pace, li mhux biss kantat fuq il-kanzunetta iżda wkoll kitbet il-lirika.
Il-ħbiberija bejn Rene’ u Rita tmur lura snin twal, iżda kienet reċentement li ddeċidew li jingħaqdu artistikament f’din il-produzzjoni. Il-lirika ta’ Illum tistħarreġ it-tema tat-transitorja – l-idea li l-ħajja hija mimlija inċertezzi u li kull mument jista’ jkun l-aħħar tagħna. Hija kanzunetta li tirrifletti l-imħabba lejn dawk li ħallewna, u tfakkarna kif din l-imħabba tkompli tgħix fina. B’messaġġ qawwi u universali, Illum tħeġġeġ lil kull min jismagħha biex iħobb illum, għax għada jista’ jkun tard wisq.
Matul dawn l-aħħar għoxrin sena, Rene’ għażel li jżomm 'il bogħod mill-festivals tal-kanzunetti f’Malta, u llum għandu l-intenzjoni li jkompli jippromovi l-mużika tiegħu b’mod indipendenti, barra minn kwalunkwe kompetizzjoni. Permezz ta’ dawn il-pubblikazzjonijiet u dawk li ġejjin, qed jesprimi l-passjoni profonda tiegħu lejn l-arti tal-produzzjoni mużikali.
F’dan il-kuntest, Rene’ joffri viżjoni differenti tal-ħolqien ta’ kanzunetta – mhux biss bħala kanzunetta b’melodija u kliem, iżda bħala ‘kompożizzjoni sonika’. Dan ifisser ħossijiet maħduma b’attenzjoni u magħqudin b’mod armonjuż biex joffru esperjenza mużikali sħiħa u oriġinali.
Il-kanzunetta Illum ħarġet il-Ġimgħa, 11 t’April u se tkun disponibbli fuq Spotify, Apple Music u YouTube.