Matul is-seba' episodju tal-programm L-Inspjegabbli, li jixxandar fuq TVM+ kull nhar ta' Tlieta fis-17:15, ser jitkellmu dwar il-profeziji ta' Nostradamus.
Sa minn meta l-bniedem beda jirraġuna u jaħseb, persuni li kienu jsejħu lilhom infushom profeti bassru avvenimenti li għadhom iridu jseħħu. F’dan il-kuntest, wieħed mill-aktar personaġġi popolari fl-istorja huwa t-tabib Franċiż Michel de Nostredame, jew kif inhu magħruf aħjar, Nostradamus.
Minkejja li għaddew mijiet ta’ snin minn meta kiteb il-profeziji tiegħu, sal-lum dawn għadhom iqajmu interess u dibattitu kbir. Imma, huwa possibbli li Nostradamus kien verament kapaċi jbassar il-futur? X’kien bassar dwar Malta?
L-espert fil-panel se jkun l-awtur Ricky Caruana. Barra minn hekk, se jkun hemm ukoll intervista esklussiva ma’ Victor Baines, il-President tan-Nostradamus Society fl-Amerika u awtur tal-ktieb Remember the Future: The Prophecies of Nostradamus.
L-Inspjegabbli jixxandar mill-ġdid il-Ħamis fil-23:15 fuq TVM+ u l-Ġimgħa fil-23:00 fuq TVM. Tistgħu wkoll issegwu l-episodji li diġà xxandru billi tidħlu f’din il-ħolqa: https://tvmi.mt/series/967.
L-Inspjegabbli huwa ppreżentat minn Kevin Mercieca, bl-għajnuna ta’ Kurt Pawley u Jonathan Farrugia fuq Produzzjoni Eżekuttiva ta’ Flash Productions.