Is-Sibt li għadda, Teresa Ruglio li tgħix ġewwa Tas-Sliema ġiet inkurunata Miss Universe Malta. Teresa mhux Maltija, imma ila tgħix f'pajjiżna għal dawn l-aħħar tliet snin. It-tfajla kif ħa taraw għandha qalba marbuta ma' dawn il-gżejjer u ċertament ħa tkun qed iġġorr il-bandiera Maltija b'unur.
Aħna saqsejnieha ftit mistoqsijiet sabiex insiru nafu lil Teresa aħjar u naraw x'għandha xi tgħid dwar il-fatt li ħa tkun qed tirrapreżenta lil pajjiżna. Jidher biċ-ċar li Teresa hi tfajla intelliġenti u ħa tagħmel lil Malta kburija għax grata tassew li qed tingħata dan il-privileġġ.
Kif tħossok wara li irbaħt dan il-konkors prestiġġjuż?
Inħossni grata ħafna u onorata, għadni qed nipproċessa l-fatt li Malta għażlietni bħala r-rebbieħa. Jien ħdimt ħafna għal din il-kompetizzjoni bħall-kontestanti l-oħra kollha, għalija huwa privileġġ kbir li ġejt inkurunata r-rebbieħa.
Int oriġinarjament mill-Venezwela, kif tħossok dwar il-fatt li se tkun qed iġġorr il-bandiera Maltija f’din il-kompetizzjoni prestiġġjuża?
Jien oriġinarjament mill-Venezwela imma jien ukoll nofsni Taljana. Inħossni kburija ħafna li ntajjar il-bandiera Maltija għaliex dan il-pajjiż tani l-opportunità li nerġa' nieħu ħajti lura u niskopri opportunitajiet ġodda.
Għalija l-fatt li qed ngħix f'Malta u qed nibni ħajti hawn, timlini b’kuraġġ u b’imħabba u lesta sabiex ngħid lid-dinja li Malta hija pajjiż magħmul mill-imħabba u l-aċċettazzjoni. Malta hija art ta' opportunitajiet għal kulħadd. Għalkemm mhux imwielda hawn qalbi dejjem grata lejn Malta.
Ritratt: Facebook / Teresa Ruglio - Mehud minn: Benjamin Sant
Kif tirrelata mas-slogan tal-konkors ta' Miss Universe ‘Confidently Beautiful’?
Għalija dan is-slogan jfisser mara mogħtija s-setgħa li temmen fiha nnifisha, timxi ’l quddiem għaliex tifhem l-importanza tal-imħabba u taħdem b'determinazzjoni għall-ħolm tagħha kuljum.
Hija mara li qiegħda dejjem tikber bħala persuna u tieħu ħsieb oħrajn. għalhekk hi tispira matul l-azzjonijiet tagħha. Nista' nirrelata wkoll dan is-slogan miegħi nnifsi, fejn irrid inwassal il-messaġġ b'saħħtu, li irrispettivament minn liema kritika nista' naffaċċja fil-vjaġġ tiegħi nibqa’ ‘Confidently Beautiful’.
X'qed tistenna l-aktar minn din il-kompetizzjoni?
Qed nistenna b’ħerqa kollox, għaliex dan huwa kapitlu ġdid f'ħajti li minnu nista' nitgħallem ħafna u nuri kemm inħobb il-pajjiż li noqgħod fih. Fir-rigward ta’ Miss Universe nnifisha ħerqana sabiex niltaqa’ ma' Steve Harvey minħabba li jien nammirah bħala kelliem motivazzjonali, u bħala kelliema motivazzjonali nnifsi, se jkun ta’ pjaċir kbir li niltaqa' miegħu.
Dan il-vjaġġ għadu kif beda u jien se nipprepara ruħi għal wirja kbira f'Miss Univers waqt li ntajjar kburija il-bandiera Maltija. Kull pass ta' dan il-vjaġġ qed nistennieh b’ħerqa kbira.
Ritratt: Facebook / Teresa Ruglio - Piccinino Lingerie
Kif tiddeskrivi l-esperjenza tiegħek s’issa?
Tal-ġenn! Diġà biddiltni ħafna bħala persuna u għalkemm f’xi jiem tista' tidher diffiċli, irrid dejjem nistenna bil-ħerqa dak li jmiss f'dan il-vjaġġ.
X'tistenna minn din l-esperjenza barra minn xtutna?
Minn din l-esperjenza qed nistenna li naqsam u nitgħallem mingħand kulħadd, għax dak hu li jagħmilni kuntenta imma l-iktar importanti hu li nesprimi l-imħabba u l-gratitudni. Il-ħolma tiegħi hi li nsir kelliema motivazzjonali u din mhix se tibqa' biss ħolma, nista' nagħmilha bis-saħħa tat-titlu Miss Universe Malta.
Ritratt: Facebook / Teresa Ruglio
X'kienet l-iktar ħaġa li int ħadt gost biha s'issa?
L-iktar ħaġa li jien gawdejt kienet il-preparazzjoni tiegħi għall-kompetizzjoni. Speċjalment, meta konna mmorru għall-provi u nqattgħu ħin mal-kontestanti kollha, li nqishom ilkoll prinċipessi. Kellna ħafna ħin flimkien, dħakna u dejjem konna ngħinu lil xulxin u nappoġġjaw lil xulxin.
Ovvjament l-appoġġ kollu bis-sħiħ tad-diretturi tagħna Alan J Darmanin u Jeff Francalanza, flimkien mal-kowċ tagħna Marvin Bunayo u r-rebbieħa tas-sena l-oħra Francesca Mifsud li lkoll kienu ta’ motivazzjoni għalina. Minħabba li din mhux biss bħall-kompetizzjonijiet oħra, il-proċess li jwasslek sal-aħħar lejl huwa proċess li titgħallem minnu f’kull ħin.
Min jispirak fil-ħajja? Għaliex?
Hemm ħafna nies li ispirawni f'ħajti. Imma żgur ngħid li ħija Bruno, li miet is-sena l-oħra, huwa kien isofri mill-iskizofrenija u kellu żmien iebes ħafna minħabba l-kundizzjoni tiegħu, imma hu kien jemmen fih innifsu.
Kellu jgħidli nħobbok, inti l-oħt favorita tiegħi, kompli agħmel dak li qed tagħmel. Hu kien dejjem umli u jitbissem. Inħobbok Bruno, din il-kompetizzjoni hija għalik.
Ritratt: Facebook / Teresa Ruglio - Mehud minn: Godfrey J Massa
Lil min tixtieq tiddedika din ir-rebħa?
Din ir-rebħa niddedika għall-Malta, il-familja tiegħi, l-għarus u n-nies kollha li jemmnu fija.
Messaġġ finali lill-qarrejja kollha tagħna.
Bi tbissima fuq wiċċi, ilbieraħ kelli l-privileġġ nirbaħ il-kuruna ta’ Miss Universe Malta 2019, inkun grata ħafna jekk inti taċċetta lili għal min jien u għal minn fejn ġejja. Il-messaġġ tiegħi għalikom huwa aħdem fuqek innifsek, apprezza l-ħajja li għandek, għix kuljum bi gratitudni u l-imħabba, tieħu xejn ovvju u gawdi kull moment.
Tkunx daqshekk diffiċli fuqek. Ftakar li nistgħu dejjem ninbidlu u nikbru. Kull ma trid tagħmel hu li tibda minnufih hawn u issa, b’attitudni pożittiva u tfittex dejjem sabiex titgħallem. Ibqa’ miexi 'l quddiem u gawdi l-vjaġġ. Jien inkun grata dejjem għal dan il-pajjiż. Inhobbkhom għal dejjem. Grazzi Malta!
Minn hawn nixtiequ nawguraw lil Teresa Ruglio, Miss Universe Malta kull suċċess fl-avventura barra minn xtutna. Din l-intervista hi xhieda ċara, li l-mudella ħa tkun ambaxattriċi mill-aqwa għal pajjiżna. Awguri Teresa!