Dalwaqt jibda Division 7 fuq ONE. Il-ġimgħa l-oħra rajna aktar dwar il-karattru ta’ Vicky. Joe ir-raġel tagħha irrid jeħles minn Tereż u Karen billi jisplodihom ġol-ħabs! Tgħid Vicky kif qed tħossha dwar dan?
Qed tibża mir-raġel tiegħek issa li għeddek li ħa joqtlok?
Lil żewġi m'għadnix ngħarfu. Għalija dak m'għadux żewġi. Huwa sempliċiment raġel illi għax dejjem fdajtu rnexxielu jdaħħalni f'basla liema bhala u ma nafx kif se ninqala' minnha. Veru li heddidni li joqtolni però mhux dik l-iktar ħaġa li tbeżżagħni. Bħalissa jagħmilli pjaċir jekk joqtolni ħalli neħles mid-diżastru li qed jiċċirkondani. Iżda li jbeżżagħni hu li jagħmel ħsara lill-iktar persuni li nħobb f’ħajti. Lill-ġenituri tiegħi. Dawk innoċenti. M'għandhomx x'jaqsmu. U hu jaf li lili se jweġġagħni mmens jekk jiġrilhom xi ħaġa.
Taħseb li jasal joqtlok imma?
Li jasal m'għandix dubju. Għalih m'għadni nfisser xejn u għandi dubji kbar jekk qatt kontx infisser xi ħaġa għalih. Jiġifieri jasal żgur. Iżda hu jaf li bijja għandu pedina u allura nemmen illi l-ewwel għażla tiegħu ma tkunx li joqtol lili.
Żewġek irrid li int tisplodi l-bomba l-ħabs, qed taħsibha jew ħa tgħinu?
Ormai tlift il-kontroll ta' ħajti. Tlift il-kontroll ta' moħħi. M'għadnix libera nagħmel dak li hu ġust. Li ma kienx għall-ġenituri tiegħi kont nagħżel triq oħra imma la għadhom magħna rrid nipproteġihom. Għandi d-dover li nipproteġihom.
Għaliex irid joqtolhom lil Tereż u Karen?
Joe ma jġerraħx is-sitwazzjoni li jkun taħt rikatt kontinwu u f'dawn it-2 donnu sab kappell jiġieħ. Tereż tafu sew! Min jaf x'taf aktar dwaru! Karen spiċċat daħlet bejn il-basla u qoxritha. Jekk ma jeħlisx minnhom ser jibqgħu jippersegwitawh u naturalment ħin x'jaħli magħhom m'għandux. Kemm kemm ma jridx ibellagħhieli li jekk imutu dawn it-tnejn jien u hu nerġgħu lura għan-normal. Jekk qatt eżista n-normal għax meta nħares lura nirrealiżża li kont qed ngħix f’ħolma.
Miskina Vicky! MIl-aktar gwardjana soda spiċċat gwardjana debboli! Imma minjaf x’ser jiġri llejla? Tgħid il-bomba ser tisplodi?