Kienu ħafna li stagħġbu li Raffaella Carrà għamlet ir-ritorn tagħha fuq Rai Tre, meqjus bħala stazzjon dgħajjef fl-udjenzi. Mhux biss iżda kien magħruf li Carrà għażlet li tmur fuq Rai Tre flok fuq xi stazzjon tal-Mediaset li magħhom hija kienet għaddejja bit-trattativi wkoll. A Raccontare Cominicia Tu hu programm li matulu Carrà, li llum tgħodd 75 sena, la tiżfen u lanqas tkanta. Tintervista biss.
Mhux faċli li għal siegħa u nofs sħiħa żżomm konversazzjoni sħiħa ma’ persuna waħda. Kien riskju kbir għal Raffaella li tagħmel dan ir-ritorn li seta’ falla, u jtemm għal kollox il-karriera tagħha. Ir-riskju għaliha kien ferm ikbar minn dak li ħadu r-Rai Tre li dejjem jissielet għall-udjenzi iżda wisq probabbli r-riżultati miksuba kienu ferm aktar milli kulħadd stenna.
L-ewwel programm kien ma’ Fiorello, segwit minn dak ma’ Sophia Loren. Sitt programmi li matulhom Raffaella żewqet il-mistednin tagħha. Bil-kariżma tagħha, Carrà żammet id-diskussjoni għaddejja u mhux biss l-udjenzi kienu b’saħħithom iżda l-kummenti fuq il-mezzi soċjali kienu mill-aktar favorevoli.
Kulħadd ammira l-fatt li Raffaella ma’ waqgħetx fin-nasba ta’ ħafna storbju u sensazzjonaliżmu u kellha programm mexxej. Rai Tre wkoll ma kellux għalxix igerger għax sploda fl-udjenzi, indikazzjoni ċara li programm tajjeb jattira l-udjenzi, ikun fuq liema stazzjon ikun.
Dan l-istaġun ta’ A Raccontare Comincia Tu kien jikkonsisti f’sitt programmi u fost l-attrazzjonijiet kien hemm Maria De Filippi li bħalissa għaddejja bil-battibekki ma’ Milly Carlucci. De Filippi, sinonima mal-istazzjonijiet rivali Mediaset, ma qagħditx lura milli taċċetta l-invit ta’ Raffaella, x’aktarx biex anki tagħti risposta lil Carlucci talli kienet qalet pubblikament li De Fillipi kienet irrifjutat l-istedina tagħha biex tmur fuq il-programm Ballando con le Stelle. Skont De Filippi, hi qatt ma kellha stedina mingħand Carlucci jew mingħand xi ħadd mit-tim tagħha.
Dan wassal biex tinħoloq aspettativa biex De Filippi tkun il-mistiedna ta’ Raffaella waqt il-programm tagħha, u ovvjament Carrà ma ddiżappuntatx. Issa jidher li hemm interess li jkun hemm it-tieni staġun ta’ A Raccontare Comincia Tu. Għalkemm ma ħareġ xejn uffiċċjali, wieħed ma setax ma jinnotax il-kummenti ta’ Raffaella Carrà stess meta qalet li kull min stiednet aċċetta għajr għal Roberto Benigni.
“Minn jaf forsi kien xi ftit xettiku iżda wara li jara dawn il-programmi, forsi jbiddel fehimtu u jaċċetta li jħallini nintervistah għal waqt il-programmi li jmiss,” kienet ikkwotat tgħid.
Wara s-suċċess miksub minn Raffaella b’dan il-programm, ikun żball kbir minn-naħa ta’ Rai Tre li jħallu lil Carrà taħrabilhom minn taħt idejhom, u għalhekk hi kważi ċerta li Raffaella se tkun qed taħdem fuq aktar programmi fiż-żmien li ġej.
Dan l-artiklu deher għall-ewwel darba fir-rivista l-Gwida li toħroġ kull ġimgħa u ssibuha għall-bejgħ mill-ħwienet ewlenin.
Instagram / @raffaellacarrafanpage