It-tielet edizzjoni ta’ The Malta Architecture and Spatial Planning (MASP) Awards qed tittella’ bil-għan li tkompli tippromwovi l-evoluzzjoni ta’ arkitettura interna u esterna ta’ kwalità ġewwa pajjiżna. L-organizzatur tal-MASP Awards, Peter Gingell, jispjega kif il-premjijiet ta’ din is-sena issa jkopru wkoll aspetti ġodda ta’ eċċellenza arkitettonika għal periti, interior designers, studenti universitarji u oħrajn fil-qasam tal-fotografija.
L-arkitettura ta’ Malta hija parti ewlenija mill-wirt nazzjonali, bi strutturi mibnija matul is-sekli tal-istorja twila tal-gżira li għadhom jiġu ammirati sal-lum. Madankollu, filwaqt li dawn il-binjiet tant apprezzati sa minn żmien il-Kavallieri jixirqilhom ikunu rinomati, l-arkitettura moderna Maltija toffri wkoll proġetti ta’ kwalità li wkoll jistgħu jħallu marka pożittiva għad-deċennji li ġejjin.
Ix-xogħol metikoluż u l-innovazzjoni wara dawn il-proġetti ikoniċi - minn professjonisti stabbiliti sa studenti universitarji - għal darb’oħra se jiġu ċċelebrati fil-MASP Awards.
“L-iskop tal-MASP Awards huwa li nirrikonoxxu x-xogħol ta’ kwalità, magħmul minn nies fl-industrija tal-arkitettura, għat-talent, il-kompetenza u s-sengħa tagħhom,” jispjega l-organizzatur tal-MASP Awards, Peter Gingell. “Proġett li jirbaħ premju jinvolvi ħafna iktar xogħol milli naħsbu; huwa sforz ta’ tim sħiħ li jeħtieġ ħin, dedikazzjoni, kompetenza u passjoni. Il-MASP Awards jippromwovu l-aqwa nies f’Malta fil-qasam tal-arkitettura u tal-ippjanar spazjali, biex jiġi rrikonoxxut il-kontribut tagħhom għall-passat, il-preżent u l-futur tal-industrija.”
Imnedija fl-2019 mill-Awtorità tal-Ippjanar taħt il-Patroċinju tal-President ta’ Malta, il-MASP Awards huma meqjusa bħala avveniment prestiġjuż ta’ kull sena u marka ta’ eċċellenza fl-industrija. Il-kumpaniji tal-arkitettura u l-istudjos tad-disinn ta’ ġewwa jibbenefikaw mill-esperjenza tat-tim, li jingħaqdu biex jissottomettu x-xogħlijiet tagħhom. Il-proċess ta’ sottomissjoni fih innifsu jagħti spinta morali u esperjenza siewja biex tintwera l-istorja tal-proġett lill-pubbliku.
“Kważi s-sottomissjonijiet kollha li nirċievu huma proġetti ta’ disinn li għamlu suċċess u jkollhom l-għan li jirbħu l-għola premju fil-kategorija rispettiva tagħhom. Kieku ma kienx għal dawn il-premjijiet ħafna minn dawn il-proġetti jibqgħu ma jiġux apprezzati u jkunu ‘stejjer moħbija’ tat-talent lokali kreattiv li għandna madwarna. Aħna nemmnu li billi nuru l-aħjar prattiki, disinn ta’ kwalità, eċċellenza arkitettonika u aktar, hemm ċans ikbar li ninfluwenzaw u nispiraw il-bidla fil-kwalità tad-disinn kollettiv li għandna bżonn fl-ambjent mibni tagħna. L-istat ta’ kuntentizza tagħna u t-titjib fil-kwalità tal-ħajja jiddependu minn din il-bidla,” jenfasizza s-Sur Gingell.
Minbarra li r-rebbieħa jirċievu iżjed kredibbiltà, kemm mal-professjonisti tal-industrija kif ukoll mal-klijenti prospettivi, kull rebbieħ ta’ premju jiġi ppreżentat bi trofew esklussiv tad-disinjatur Kane Cali, ispirat mill-forom angolari tal-fortifikazzjonijiet famużi tal-Belt Valletta. Ir-rebbieħa jingħataw l-opportunità li jipparteċipaw f’firxa wiesgħa ta’ inizjattivi kummerċjali u ta’ relazzjonijiet pubbliċi għal sena.
Il-MASP Awards ta’ din is-sena jinkorporaw bidliet li jirriflettu bl-aħjar mod l-industrija dinamika li jirrappreżentaw. Flimkien mal-introduzzjoni ta’ kategoriji ġodda u xi reviżjonijiet ta’ oħrajn eżistenti, it-tielet edizzjoni se tkun l-ewwel waħda li tirrikonoxxi l-apprezzament tal-pubbliku ġenerali lejn l-arkitettura ta’ kwalità lokali.
Wara rispons mill-partijiet interessati fl-industrija, il-Premju ta’ Riabilitazzjoni u Restawr tal-edizzjonijiet preċedenti nqasam fi tnejn billi issa hemm premju separat li jirrikonoxxi proġetti fejn l-enfasi primarja kienet li tiġi rrestawrata u ppreservata l-awtentiċità ta’ bini u monumenti. Il-premju tad-disinn issa ġie estiż biex jinkludi bini u strutturi li mhux biss jinsabu f’ambjent urban, iżda li juru disinn sabiħ f’ambjent rurali jew marittimu. Sadanittant, premju ġdid għall-Arkitettura Residenzjali huwa ddedikat għal bini residenzjali ta’ kwalità.
Il-firxa ta’ dawn il-MASP Awards se testendi aktar min dik ta’ edizzjonijiet preċedenti. Premju ġdid għall-Fotografija tal-Arkitettura huwa miftuħ għal kulħadd f’Malta, li ser jinkludi sottomissjonijiet ta’ fotografija ta’ arkitettura lokali mibnija wara l-1960. Bl-istess mod, din is-sena l-pubbliku jista’ wkoll jivvota online għal kwalunkwe proġett fil-premjijiet, bir-rebbieħ ġenerali jirċievi rikonoxximent addizzjonali.
Iċ-Ċerimonja tal-Premjijiet għall-edizzjoni tal-2021 se ssir fit-Teatru Manoel fil-Belt Valletta nhar is-Sibt 26 ta’ Frar 2022, f’konformità mal-protokolli attwali kollha tal-Covid-19. Wieħed jista’ jissottometti applikazzjoni għall-premjijiet sal-Erbgħa 5 ta’ Jannar 2022, filwaqt li l-votazzjoni tal-pubbliku se ssir bejn l-24 ta’ Jannar u l-5 ta’ Frar 2022.
“Il-ġurija se tevalwa l-forma, il-funzjoni, l-innovazzjoni, il-kwalità, is-sostenibbiltà u l-effiċjenza tal-enerġija ta’ kull proġett biex tagħżel ir-rebbieħ f’kull kategorija,” temm jgħid is-Sur Gingell. “Il-MASP Awards huma opportunità kemm għal dawk li ma’ ilhomx jaħdmu fl-industrija kif ukoll għal dawk li huma esperjenzati sew fl-industrija biex jingħaqdu flimkien u juru l-proġetti ta’ kwalità u l-ideat innovattivi tagħhom, għall-benefiċċju tal-futur tal-arkitettura Maltija.”
Aktar informazzjoni u dettalji tas-sottomissjonijiet huma disponibbli online fuq HAWN
Text Box:
- Rehabilitation & Conservation Award
- Restoration Award
- Design Award for Good Architecture, Building and Structure
- Residential Architecture Award
- Public Open Spaces Award
- Commercial and Public Buildings Award
- Interior Architecture Award for residential projects
- Interior Architecture Award for Commercial or Public Buildings
- Urban Planning Concept Award
- Hospitality, Tourism Accommodation & Leisure Award
- Emerging Architect Award
- Architecture Photography Award
