Il-Jum Marittimu Dinji huwa ċċelebrat kull sena f’Settembru biex ifakkar l-importanza tal-industrija marittima u l-irwol kruċjali li għandha fl-ekonomija globali. Din il-ġurnata tfakkar l-isfidi li jiffaċċjaw l-operaturi marittimi, is-sigurtà tal-baħar, u t-tmexxija sostenibbli tal-oċeani u l-baħar.
Pajjiżna, li għandu pożizzjoni strateġika fil-Mediterran, għandu tradizzjoni qawwija marittima anke meta wieħed iħares lejn l-istorja ta' pajjiżna. Il-Jum Marittimu Dinji jservi bħala tifkira tal-kontribut vitali li l-industrija marittima tagħti lill-pajjiż u lid-dinja, kemm fl-impjiegi kif ukoll fl-iżvilupp ekonomiku.
Din il-ġurnata hija wkoll opportunità biex nikkunsidraw l-importanza tal-konservazzjoni tal-oċeani u kif l-industrija tista’ tgħin biex jiġi protett l-ambjent marittimu. F’din l-okkażjoni, entitajiet u organizzazzjonijiet differenti jikkollaboraw biex itejbu l-kundizzjonijiet tax-xogħol tal-baħħara u biex jiġi assigurat li l-baħar ikun dejjem spazju sigur u sostenibbli għall-ġenerazzjonijiet futuri.
