Ix-xahar li għadda, il-kantant lokali Dario Bezzina żżewweġ lill-partner tiegħu Brian Mifsud. Waħda mis-sorpriżi waqt it-tieġ tagħhom kienet li Dario kanta l-kanzunetta Illum, kanzunetta li għandha lirika ta' Joe Julian Farrugia u kompożizzjoni ta' Philip Vella. Kanzunetta bi produzzjoni ta' Sean Vella.
Lill-kantant kmieni din is-sena rajnieh fil-finali ta' Mużika Mużika bil-kanzunetta Ħolma ta' Mument u rajnieh jikseb it-tielet post fil-festival l-Għanja tal-Poplu bil-kanzunetta Fissidni. Kanzunetta li ddedika lill-għażiża ommu.
Il-kanzunetta ta' mħabba li titkellem dwar l-importanza li tgawdi kull mument fil-ħajja mal-persuna speċjali f'ħajtek mingħajr ma jkollok indħil minn dawk ta' madwarek. Kull koppja jkollha bżonn il-ħin tagħha, lil hinn mill-ġenn tal-ħajja li ngħixu fiha.
Wieħed jista' jisma' l-kanzunetta fuq il-mezzi diġitali kollha.
