Fuq il-paġna tagħhom Moviment Graffitti qasmu l-aħbar li wara li kien hemm nuqqas ta' qbil bejn il-KSU u huma sabu l-istand tagħhom żarmata waqt il-Freshers' Week tal-Università.
Huma jiktbu, "Dalgħodu morna mal-istand tal-Freshers’ Week tagħna fil-Campus tal-Università u sibna din is-sitwazzjoni. Il-Kunsill Studenti Universitarji (KSU) żarmawlna l-istand għaliex riedu jiddeċiedu huma x’tip ta’ materjal ikollna fiha."
Moviment Graffitti jkomplu, "Ma titwemminx, imma qalulna li materjal marbut mad-drittijiet riproduttivi tal-mara kellu jiitneħħa. Ovvjament, aħna m’aċċettajniex. Għalhekk dal-lejl marru bil-moħbi jżarmaw l-istand tagħna u jikkonfiskaw il-materjal li kien hemm fiha."
Huma jkomplu, "Università suppost hija ċ-ċentru ta’ diskussjonijiet u ideat differenti, mhux fl-Università biss, imma fil-pajjiż kollu. Iżda l-KSU jaħsbu li huma xi dittaturi tal-morali u li għandhom jiddettaw lill-istudenti x’jiddiskutu u ma jiddiskutux. Nagħtukom aktar aġġornamenti fil-ħin li ġej."
X'taħsbu dwar dan?