Aktar kmieni llum, Antoine Degabriele, raġel ta’ 51 sena residenti ż-Żejtun instab mejjet fi Triq Anton Buttigieg fiż-Żejtun, għall-ħabta tal-11:45pm.  Il-pulizija għadha qed tfittex is-sewwieq illi tajjar lill-vittma għaliex sfortunatament qed jissuspettaw illi dan kien każ ta’ hit and run.   

Bla dubju, il-qraba u l-ħbieb tar-raġel, kif ukoll il-komunità kollha taż-Żejtun, jinsabu taħt xokk wara din l-aħbar, u kienu bosta li qasmu l-ħsibijiet ta’ qsim il-qalb tagħhom fuq il-midja soċjali. 

Fosthom, mara residenti ż-Żejtun li kellha ħafna memorji ma’ Antoine, kitbet “X'aħbar kerha din... kemm memorji għaddejjin minn quddiemi, Antoine... Dejjem ċajtier u kollna storbju fejn inkunu.  Ma kienx ħaqqek tmut hekk.” 

Oħrajn iddiskrevewh bħala persuna dejjem bi tbissima u li jġib il-ferħ miegħu kull fejn imur, kif ukoll ikkummentaw illi "Irrid ikollok stonku biex tħalli persuna mal-art u tibqa' sejjer."

Jistrieħ fis-sliem.  Kondoljanzi lil kull min b’xi mod jew ieħor kien viċin ta’ Antoine. 


Marija Bellia