Is-sajf magħna u kulħadd jibda jkun konxju ta’ kif jidher. Għalhekk hawn min jibda jiekol daqsxejn iżjed ikel sustanzjuż u forsi jagħmel xi naqra iktar eżerċizzju. Hawnhekk għandek għaxar ideat ta’ x’tista’ tnaqqar matul il-ġurnata. Apparti li dawn l-ideat fihom madwar 200 kalorija, huma sustanzjużi wkoll!
1. Tuffieħa u Magħrfa Peanut Butter
Barra li fih madwar 200 kalorija, huwa mimli bil-proteini u l-fibra. Apparti hekk, it-tuffieħa nnifisha fiha diversi vitamini u minerali, filwaqt li l-peanut butter, minħabba l-proteini li fih jgħinek biex tħossok mimlija.
2. Biċċiet tal-Karrotti Bi Ftit Dipp
Il-karotti fihom ħafna vitamini, fosthom il-vitamina A! Jekk tbill il-karotti, nejjin jew misjurin ġo dipp li tkun għamiltu inti, se tkun qed tnaqqar xi ħaġa tajba, sustanzjuża u bi ftit kaloriji!
3. Lewż
Il-lewż, barra li huwa sustanzjuż, huwa prattiku ħafna biex iġġorru miegħek. Barra minn hekk, fih ħafna proteini.
4. Yoghurt bil-Frawli
Il-Yoghurt huwa ikla żgħira prattika ħafna għal min ikun mgħaġġel. Dan nistgħu nżiduh b’xi tip ta’ frott, fosthom il-frawli, li fiha ħafna vitamini u ftit kaloriji! Però importanti naraw liema yoghurts inkunu qed nixtru. Huwa rikomandat li nixtru dawk li għandhom l-inqas zokkor.
5. Biċċa Ħobż Mixwija Bir-Rikotta
Il-Maltin iħobbuh mhux ftit il-ħobż! U biex tiekol ikel sustanzjuż tista’ tiekol xi naqra ħobż ukoll! Biċċa ħobż mixwija b’naqra rikotta fuqha fiha madwar 200 kalorija biss!
6. Frott Magħsur
Bħalissa fis-sħana dan perfett! Frisk u sustanzjuż! Itfa’ ftit frott, għasru u barra bid-daqq!
7. Żewġ Bajdiet
Tista’ tgħallihom jew tagħmilhom ġo froġa b’xi naqra ħaxix! Fi ftit minuti jkollok ikla ċkejkna lesta, tajba, bnina u bi ftit kaloriji!
8. Pizza Ċkejkna
Fuq biċċa ħobż samra, itfa’ naqra tadam u naqra ġobon u ħallih jinħall. Imbagħad għidli x’inti tiekol!
9. Insalata Friska
Qatta’ ftit ħaxix, pereżempju ħass, tadam, karotti, ħjar u bżar tal-kulur. Imbagħad żid miegħu xi biċċa tiġieġa mixwija jew xi bott ton taż-żejt.
10. Frott
Qatta’ porzjon ta’ frott ġo skutella, li bħalissa żġur jinżillek għasel, speċjalment jekk il-frott ikun kiesaħ! Barra minn hekk din l-ikla żgħira, hija prattika biex iġġorrha miegħek.
Nispera li dawn l-ideat kienu ta’ għajnuna! Huwa importanti li nagħmlu ħilitna biex ngħixu ħajja sana għax għandna ġisem wieħed biss u rridu nieħdu ħsiebu! Issa li ġej is-sajf nibdew naraw ħafna ritratti ta’ nies ħdejn il-baħar. Però dejjem żommu f’raskom li d-dehra mhijiex kollox. Kif tidher mhuwiex dak li jagħmlek inti!
@nutritionchimp